‘ఆర్థిక’ శ్వేతపత్రం రూపకల్పనపై మంత్రి పయ్యావుల కేశవ్‌ ఆరా

ఈనాడు, అమరావతి: జగన్‌ పాలనలో రాష్ట్రంలో ఆర్థిక అరాచకంపై శ్వేతపత్రం సిద్ధమవుతోంది. ఇందుకోసం ఆర్థిక మంత్రి పయ్యావుల కేశవ్‌ మంగళవారం తన ఛాంబరులో ఆర్థికశాఖ ముఖ్య కార్యదర్శి పీయూష్‌ కుమార్, కార్యదర్శులు వినయ్‌చంద్, జానకి తదితరులతో సమావేశమయ్యారు. శ్వేతపత్రం రూపకల్పన ఎంత వరకు వచ్చిందో ఆరా తీశారు. ప్రధానంగా రాష్ట్రంలో ఉన్న పెండింగు బిల్లుల వివరాలపై చర్చించారు. పెండింగు బిల్లుల సమగ్ర సమాచారం తెలియజేయాలని ఇప్పటికే అన్ని ప్రభుత్వ విభాగాల అధికారులకు సూచించారు. ఆయా శాఖల నుంచి సరైన సమాచారం అందలేదని తెలియడంతో మంత్రి ఆగ్రహం వ్యక్తం చేశారు. అన్ని విభాగాధిపతులకు మరో సర్క్యులర్‌ జారీ చేయాలని ఆదేశించారు. సమగ్ర వివరాలు సమర్పించకపోయినా, అందులో లోపాలు ఉన్నాయని తేలినా చర్యలు తీసుకుంటామని వారికి తెలియజేయాలని మంత్రి సూచించారు.

సీఎంతోనూ అధికారుల భేటీ

ఆర్థికశాఖ ఉన్నతాధికారులు మంగళవారం రాత్రి సీఎం చంద్రబాబును కలిశారు. ముఖ్యమంత్రి దిల్లీకి వెళ్లనుండటం, ఆ పర్యటనలో కేంద్ర ఆర్థికశాఖ మంత్రి నిర్మలా సీతారామన్‌నూ కలవనున్నారు. ఈ నేపథ్యంలో కేంద్ర ఆర్థిక మంత్రికి నివేదించాల్సిన అంశాలపై సీఎం ఆర్థికశాఖ అధికారులతో మాట్లాడారు. చంద్రబాబు వెంట ఆర్థికశాఖ ముఖ్య కార్యదర్శి సైతం వెళ్లనున్నట్లు సమాచారం.