చంద్రబాబు చిత్రపటానికి ఎంపీల పాలాభిషేకం

దిల్లీలో చంద్రబాబు చిత్రపటానికి పాలాభిషేకం చేస్తున్న తెదేపా ఎంపీలు

ఈనాడు, దిల్లీ: ఎన్నికల సమయంలో ఇచ్చిన మాట ప్రకారం నిరుపేదలు, దివ్యాంగులకు ఏప్రిల్‌ నుంచి పెంచిన పింఛను అందజేసిన ముఖ్యమంత్రి చంద్రబాబు చిత్రపటానికి తెదేపా ఎంపీలు సోమవారమిక్కడ పాలాభిషేకం చేశారు. సోమవారం ఉదయం నుంచి సాయంత్రంలోపు 95% మందికి ఇళ్లవద్దకే వెళ్లి పెద్దమొత్తంలో పింఛను అందించడం అన్నది దేశంలో ఒక చరిత్ర అని పేర్కొన్నారు. తెదేపా వ్యవస్థాపక అధ్యక్షుడు ఎన్టీఆర్‌ మొదలుపెట్టిన పింఛను విధానాన్ని చంద్రబాబు మరింత విస్తరించి పేదలకు పెద్దకొడుకుగా మారారని ఎంపీలు శ్లాఘించారు. సంక్షేమం, అభివృద్ధి అన్నది ఒక్క తెలుగుదేశంతోనే సాధ్యమని చంద్రబాబు మరోసారి నిరూపించారని తెలిపారు. ఈ కార్యక్రమంలో తెదేపా పార్లమెంటరీ పార్టీ నేత లావు శ్రీకృష్ణదేవరాయలు, ఎంపీలు కేశినేని చిన్ని, హరీష్‌మాథుర్‌ బాలయోగి, అంబికా లక్ష్మినారాయణ, శ్రీభరత్, కలిశెట్టి అప్పలనాయుడు, బస్తిపాటి నాగరాజు, దగ్గుమళ్ల ప్రసాద్,  కృష్ణప్రసాద్‌లు పాల్గొన్నారు.