తితిదే వెబ్‌సైట్‌లో బోర్డు నిర్ణయాలు

భక్తులకు అందుబాటులో లేని గత బోర్డు తీర్మానాలు 

తిరుమల, న్యూస్‌టుడే: భక్తుల సౌకర్యార్థం తితిదే తీసుకుంటున్న పలు నిర్ణయాలకు సంబంధించి మరింత పారదర్శకతను పాటిస్తూ గతేడాది ఆగస్టు ఏడో తేదీనుంచి ఈ ఏడాది మార్చి 11వ తేదీ వరకు ధర్మకర్తల మండలి తీసుకున్న నిర్ణయాలను తితిదే వెబ్‌సైట్‌లో అప్‌లోడ్‌ చేసినట్లు తితిదే ఆదివారం ఓ ప్రకటనలో తెలిపింది. తితిదే ధర్మకర్తల మండలి, స్పెసిఫైడ్‌ అథారిటీలు 1993 మే పదో తేదీ నుంచి గతేడాది జూన్‌ 19వ తేదీ వరకు తీసుకున్న నిర్ణయాలను ఇదివరకే తితిదే వెబ్‌సైట్‌లో నమోదు చేసింది. ఆ తరువాత అప్‌లోడ్‌ చేయలేదు. గత పాలక మండలి ఛైర్మన్‌ భూమన కరుణాకరరెడ్డి ఆధ్వర్యంలో తితిదే ధర్మకర్తల మండలి భారీగా తితిదే నిధులను కాంట్రాక్టులకు మంజూరు చేయడంతోపాటు కీలక నిర్ణయాలను తమకు అనుకూలంగా తీసుకున్నారనే ఆరోపణలున్నాయి. ఈ నేపథ్యంలో పాలకమండలి నిర్ణయాలను వెబ్‌సైట్‌లో అందుబాటులో లేకుండా చేశారు. మొదట్లో తితిదే పాలకమండలి సమావేశాలను ఎస్వీబీసీలో ప్రత్యక్ష ప్రసారం చేసేవారు. ఈ విధానానికీ స్వస్తి పలికారు. బోర్డు తీర్మానాలను భక్తులకు అందుబాటులోకి తీసుకురాలేదు. దీనిపై ప్రజాసంఘాలు, మీడియాల్లో కథనాలు ప్రచురితమైనా ఎవరూ పట్టించుకోలేదు. ప్రస్తుతం ఈవోగా జె.శ్యామలరావు బాధ్యతల స్వీకరించాక చేపడుతున్న ప్రక్షాళనలో భాగంగా గత పాలకమండలి నిర్ణయాలను భక్తులకు అందుబాటులోకి తెచ్చారు.