విజయవాడ ప్రాంతీయ పాస్‌పోర్టు కార్యాలయానికి అవార్డు

దేశంలోనే రికార్డుస్థాయిలో ఏటా 3.75 లక్షల మందికి జారీ

విదేశాంగశాఖ సహాయ మంత్రి కీర్తివర్ధన్‌సింగ్‌ చేతుల మీదుగా అవార్డు అందుకుంటున్న శివహర్ష  

ఈనాడు, అమరావతి: విజయవాడలోని ప్రాంతీయ పాస్‌పోర్టు కార్యాలయానికి దేశంలోనే ఉత్తమ సేవా విభాగంలో విదేశీ వ్యవహారాల మంత్రిత్వశాఖ నుంచి అవార్డు లభించింది. జూన్‌ 24న దిల్లీలో జరిగిన పాస్‌పోర్టు సేవా దివస్‌ కార్యక్రమంలో విదేశాంగశాఖ సహాయ మంత్రి కీర్తివర్ధన్‌సింగ్‌ చేతుల మీదుగా అవార్డును విజయవాడ ప్రాంతీయ పాస్‌పోర్టు అధికారి శివహర్ష అందుకున్నారు. విజయవాడలో బుధవారం  విలేకరుల సమావేశంలో శివహర్ష ఈ విషయం తెలిపారు. 2023-24లో రికార్డుస్థాయిలో 3.75 లక్షల పాస్‌పోర్టులను జారీ చేయడం ద్వారా ఈ ఘనత సాధించినట్లు తెలిపారు. దేశంలోని 37 పాస్‌పోర్టు రీజియన్‌ కార్యాలయాల పరిధిలో అంతకుముందు ఏడాది కంటే 15 శాతం అధికంగా జారీ చేయగా, విజయవాడలో 20 శాతం దాటడం గొప్ప విషయమని శివహర్ష తెలిపారు. 13 పోస్టాఫీసు సేవాకేంద్రాలు, విజయవాడ, తిరుపతిలోని పాస్‌పోర్టు కార్యాలయాల ఆధ్వర్యంలో ఈ ఘనత సాధించామని వివరించారు. దరఖాస్తు చేసుకున్న తర్వాత  కేవలం రెండు మూడు రోజుల్లో పాస్‌పోర్టును జారీ చేసే దిశగా ప్రయత్నిస్తున్నట్లు తెలిపారు. ప్రస్తుతం 600 మందికి సేవలు అందిస్తున్నామన్నారు. త్వరలోనే సేవలను విస్తరించడం ద్వారా రోజుకు 1,200 మందికి పెంచనున్నట్లు చెప్పారు.