కాలినడకన తిరుమలకు రాజధాని రైతులు

కాలినడకన తిరుమలకు చేరుకుంటున్న అమరావతి రాజధాని రైతులు

తిరుమల, న్యూస్‌టుడే: రాష్ట్రంలో ఎన్డీయే ప్రభుత్వం ఏర్పాటవడం, అమరావతి ఉద్యమ ఆకాంక్షలు నెరవేరడంతో రాజధాని ప్రాంత రైతులు బృందాలుగా తిరుమలకు చేరుకుంటున్నారు. పాదయాత్ర చేపట్టిన రెండు బృందాల్లో ఒకటి బుధవారం తిరుమలకు చేరింది. రాజధాని పరిధిలోని వెంకటపాలెం శ్రీవేంకటేశ్వరస్వామి ఆలయం నుంచి దాదాపు 11 మంది రైతులు తిరుమలకు కాలినడకన ఈనెల 13న బయలుదేరారు. 14 రోజుల్లో రోజుకు 35 కి.మీ.చొప్పున నడుస్తూ మంగళవారం సాయంత్రం ఇక్కడికి చేరుకున్నారు. న్యాయస్థానం నుంచి దేవస్థానం మొక్కులో భాగంగా తిరుమలకు వచ్చినట్లు బృందానికి నేతృత్వం వహించిన ముప్పవరపు వెంకటేశ్వరరావు, ఆలపాటి బాలచంద్రరావు తెలిపారు. అమరావతే రాజధాని అంటూ అధికారంలోకి వచ్చిన గత వైకాపా ప్రభుత్వం మాట తప్పిందని.. రాజధానికి 33 వేల ఎకరాలిచ్చిన రైతులను రోడ్డున పడేసిందని బృందంలోని అబ్బూరి శ్రీనివాసరావు పేర్కొన్నారు. శ్రీవారి ఆశీస్సులతో తమ పోరాటం విజయవంతమైందని జొన్నలగడ్డ భాస్కరరావు వివరించారు.