హైకోర్టులో ప్రత్యేక పన్నుల బెంచ్‌ ఏర్పాటుకు కృషి చేయాలి

ఆర్థికమంత్రి పయ్యావుల కేశవ్‌

ఈనాడు డిజిటల్, అమరావతి: పన్ను ఎగవేతదారులను నియంత్రించి, సక్రమంగా పన్నులు చెల్లించేవారిని ప్రోత్సహించాలని వాణిజ్య పన్నుల అధికారులకు ఆర్థికమంత్రి పయ్యావుల కేశవ్‌ సూచించారు. రాష్ట్రంలో వస్తువుల వినిమయం పెరిగేలా చూడాలని కోరారు. బుధవారం వాణిజ్య పన్నుల కమిషనర్‌ కార్యాలయంలో ఆ శాఖ అధికారులతో సమీక్ష నిర్వహించారు. ఈ సందర్భంగా ఆయన మాట్లాడారు. హైకోర్టులో ప్రత్యేక పన్నుల బెంచ్‌ ఏర్పాటుకు కృషిచేయాలని కోరారు. రానున్న వంద రోజుల్లో చేయాల్సిన పనులను వారికి నిర్దేశించారు. సమావేశంలో చీఫ్‌ కమిషనర్‌ గిరిజా శంకర్, ప్రత్యేక కమిషనర్‌ ఆనంద్, కమిషనర్లు రమేశ్, రవిశంకర్, ప్రాంతీయ అదనపు కమిషనర్లు పాల్గొన్నారు.