Rushikonda: ‘రుషికొండ’ నిర్మాణ సంస్థ సర్దేసుకుందా?

ఇంకా మిగిలే ఉన్న తుది దశ పనులు

గతంలో ఇక్కడే గుత్తేదారు సంస్థ కార్యాలయాలు ఉండేవి

ఈనాడు, విశాఖపట్నం: పర్యాటక రిసార్టు పేరుతో జగన్‌ విశాఖలోని రుషికొండ మీద నిర్మించుకున్న ప్యాలెస్‌లలో ఇంకా ఇంటీరియర్, ఫర్నిచర్‌ పనులు మిగిలున్నాయి. మళ్లీ వైకాపా ప్రభుత్వం వస్తుందనే నమ్మకంతో వాటిని నెమ్మదిగా సాగించారు. ఈ ఏడాది నవంబరు 14 నాటికి పూర్తిస్థాయిలో ప్రాజెక్టు అప్పగింతకు గుత్తేదారు సంస్థతో నాడు ఒప్పందం చేసుకున్నారు. తొలి గడువు ముగిసినా, చివరిదశ పనుల కోసం పొడిగించుకున్నట్లు సమాచారం. చేయాల్సిన పనులున్నా ఆ ప్రాజెక్టు గుత్తేదారు సంస్థ క్యాంపు కార్యాలయాన్ని రుషికొండ నుంచి తరలించేసింది. 

కనిపించని కార్యాలయం: రుషికొండ మీద జగన్‌ కోసం రాజసౌధాల నిర్మాణ పనులను వైకాపా నేతకు చెందిన ఓ గుత్తేదారు సంస్థే చేపట్టింది. కొండను   బోడిగుండు చేయడం మొదలుకొని చివరగా చేపట్టిన ఇంటీరియర్, ఫర్నిచర్‌ కొనుగోలు పనులూ అదే సంస్థ ద్వారా జరిగాయి. ఇప్పటికే ఆ సంస్థకు రూ.400 కోట్లకుపైగా బిల్లులు చెల్లించారు. గతంలో కంటెయినర్లలో ఉన్న తాత్కాలిక కార్యాలయాన్నీ తరలించేశారు. 

కొండమీద నాలుగు బ్లాకుల్లో ఏడు ప్యాలెస్‌లను నిర్మించగా వాటిలో ఫర్నిచర్‌ పనులు జరగాల్సి ఉంది. జగన్‌ కోసమని నిర్మించిన విజయనగర ప్యాలెస్‌-1, 2, 3లలో ఫర్నిచర్‌ ఏర్పాటుచేయాలి. 

కేసుపై నెలాఖరుకు స్పష్టత: రుషికొండ ప్రాజెక్టుపై హైకోర్టు, ఎన్జీటీలలో కేసులు నడుస్తున్నాయి. అక్రమ తవ్వకాలు, నిర్మాణాల్లో ఉల్లంఘనలు జరిగినట్లు నిపుణుల కమిటీ నివేదికను చూస్తే స్పష్టమవుతుందని ఇప్పటికే హైకోర్టు స్పష్టత ఇచ్చింది. ఆ నివేదిక ఆధారంగా చర్యలు తీసుకునేందుకు కేంద్ర అటవీ, పర్యావరణశాఖ (ఎంఓఈఎఫ్‌) మరో కమిటీని నియమించింది. అది క్షేత్రస్థాయిలో తనిఖీలు చేపట్టి చర్యలపై నివేదిక సమర్పించే సమయంలో ఆ కమిటీ ఛైర్మన్‌ ఆకస్మికంగా మృతిచెందారు. ఈ నెలాఖరుకు   ఆ నివేదిక సమర్పించే అవకాశం ఉంది. వీటన్నింటినీ పరిశీలించాక హైకోర్టు తుది తీర్పు వెల్లడించనుంది.