పార్కిన్సన్స్‌కి ‘ఏఐ’ పరీక్ష!

కీలుకీలులోనూ సూదితో గుచ్చినంత బాధ, చేతులూ కాళ్ళలో వణుకు, కాసేపు నిల్చోవాలన్నా పట్టుతప్పి పడిపోయే ప్రమాదం... ఇవన్నీ పార్కిన్సన్స్‌ లక్షణాలు. ప్రపంచ వ్యాప్తంగా 85 లక్షలమంది ఈ సమస్యతో బాధపడుతుంటే ఏటా మూడు లక్షలమంది కన్నుమూస్తున్నారట. మన శరీరాంగాలు ఒకదానికొకటి సమన్వయంతో పనిచేయడం కోసం డోపమైన్‌ అనే రసాయనం ఉత్పత్తి అవుతుంటుంది. మెదడులో అది స్రవించే చోట వ్యర్థ కణాలు పేరుకుపోయి- వాటి ప్రభావంతో ఆరోగ్యవంతమైన ఇతర కణాలూ క్షీణించడం వల్లే పార్కిన్సన్స్‌ సమస్య వస్తుంది. ఈ సమస్య రావడానికి ఏడేళ్ళ నుంచి మూడున్నరన్నేళ్ళ ముందుగా- దానికి సంబంధించిన ప్రొటీన్‌లు కొన్ని మన రక్తంలో కనిపిస్తాయని శాస్త్రవేత్తలు ఇదివరకే గుర్తించారు. తాజాగా- ఆ ప్రొటీన్‌లని అత్యంత వేగంగా గుర్తించే ఓ కృత్రిమ మేధ(ఏఐ)ని రూపొందించారు యూనివర్సిటీ కాలేజ్‌ ఆఫ్‌ లండన్‌ శాస్త్రవేత్తలు. అమెరికాలో వందమంది పైన దీన్ని పరీక్షిస్తే సుమారు 70 మందికి భవిష్యత్తులో ఈ సమస్య వస్తుందని ‘ఏఐ’ చెప్పిందట. అది చెప్పినట్టే - మూడేళ్ళ తర్వాత వాళ్ళలో పార్కిన్సన్స్‌ వ్యాధి రావడం గమనించారు. ఆరకంగా ‘ఏఐ’ వందశాతం కచ్చితంగా రోగనిర్ధారణ చేసినట్టు తేల్చారు. ఇలా ముందుగానే పసిగట్టడం వల్ల మెదడులోని కణాల క్షీణతని సమర్థంగా అడ్డుకోవచ్చంటున్నారు శాస్త్రవేత్తలు!