మెదడుకి అల్ట్రాసౌండ్‌ స్కాన్‌?!

కాళ్ళూ చేతులు అకస్మాత్తుగా పనిచేయకుంటేనో, మాటల్లో తడబాటు మొదలైతేనో సాధారణంగా మెదడునే పరీక్షిస్తారు వైద్యులు. ఇప్పటిదాకా ఇందుకోసం సీటీ స్కాన్‌, ఎమ్మారై స్కాన్‌లే ఉపయోగిస్తున్నారు. ఈ రెండూ కాకుండా- అల్ట్రాసౌండ్‌ స్కాన్‌ తీస్తే మెదడులోని రక్త ప్రవాహం తీరుతెన్నుల్నీ మరింత చక్కగా చూడొచ్చు. పైగా- ఎమ్మారైతో పోలిస్తే అల్ట్రాసౌండ్‌కి ఖర్చు తక్కువే అవుతుంది. సమస్య ఏమిటంటే- అల్ట్రాసౌండ్‌ తరంగాలు మన పుర్రెని దాటి మెదడులోపలికి వెళ్ళడం కష్టం. వాటిని దాటుకుని వెళ్ళేలా ఇదివరకే రూపొందించిన కొన్ని స్కానర్లు ఆశించిన ఫలితాలు ఇవ్వడంలేదు. తాజాగా- దీనికో పరిష్కారం సాధించారు సౌత్‌ కరోలినా స్టేట్‌ యూనివర్సిటీ పరిశోధకులు. ఓ చిన్న ఆపరేషన్‌తో ‘పారదర్శక ఫిల్మ్‌’ ఒకదాన్ని పుర్రెని దాటి లోపలికి పంపగలిగారు. ఎమ్మారై స్కాన్‌ కన్నా సూక్ష్మంగా మెదడు తీరుతెన్నుల్ని వాళ్ళు గుర్తించగలిగారు. ఈ ప్రయోగాన్ని ఏ రోగిపైనో చేయలేదు. ఓ మామూలు వ్యక్తి- అతను తన రోజువారీ పనులు చేస్తుండగానే ఈ స్కాన్‌ తీయగలిగారు. ఇందుకోసం రోగి పడుకునే ఉండాల్సిన అవసరం లేదని చెబుతున్నారు.