ఖాళీగా కూర్చునే పోటీ!

సాధారణంగా ఏవైనా పోటీలు నిర్వహించినప్పుడు అందుకు తగ్గట్టు కష్టపడాల్సి ఉంటుంది. టాస్క్‌ని బట్టి ఆడటమో, పని చేయడమో, ప్రశ్నలకు సమాధానం చెప్పడమో చేయాలి. కానీ దక్షిణ కొరియాలో నిర్వహించే ఓ పోటీ గురించి తెలిస్తే ఆశ్చర్యపోకుండా ఉండలేం. ఏ మాత్రం కష్టపడకుండా, ఏ పనీ చేయకుండా ఖాళీగా కూర్చోవడమే ఆ పోటీ. అసలు ఎందుకీ పోటీ అంటే- దక్షిణ కొరియాలో పని లేకుండా ఖాళీగా ఉండటాన్ని వెనకబడినట్లుగా భావించి- ఎప్పుడూ ఏదో ఒక పని చేస్తూ ఒత్తిడి బారిన పడుతున్నారట అక్కడి ప్రజలు. ఆ క్రమంలో ఎదురయ్యే ఒత్తిడిని తగ్గించేందుకే వూప్స్‌యాంగ్‌ అనే విజువల్‌ ఆర్టిస్ట్‌- ‘స్పేస్‌ అవుట్‌ కాంపిటీషన్‌’ పేరిట పోటీ నిర్వహించి- తమ నిబంధనలకు అనుగుణంగా ఖాళీగా కూర్చోగలిగిన వారికి ట్రోఫీని అందజేస్తోంది. దాదాపు గంటన్నరసేపు ఉండే ఈ పోటీలో పాల్గొన్నవారు- నిద్రపోవడం, ఫోను చూడటం, మాట్లాడటం వంటివేమీ చేయకూడదు. ఆ సమయంలో వారి గుండె వేగం నిలకడగా ఉండాలి. పోటీదారుల్ని అన్ని రకాలుగా పరీక్షించి అలా ఉన్నవారినే విజేతలుగా ప్రకటిస్తారు. ఏడాదికోసారి జరిగే ఈ పోటీల్లో ఎనిమిదేళ్ల నుంచి ఎనభై ఏళ్ల వారి వరకూ పాల్గొనొచ్చు.