దిష్టిదోషాలు పోగొట్టే శక్తిస్వరూపిణి!

బండె మహంకాళి... పేరుకు ఉగ్రరూపమైనా ప్రసన్న వదనంతో, చల్లని చూపులతో కనిపిస్తూ తనని దర్శించుకునేవారి దోషాలను తొలగించి సకల శుభాలనూ కలిగిస్తుందీ జగన్మాత. అమ్మవారి అనుగ్రహం ఉంటేనే తప్ప దేవిని ఎవరూ దర్శించుకోలేరని చెప్పే ఈ క్షేత్రానికి వందల సంవత్సరాల చరిత్ర ఉందని ప్రతీతి. ఏడాది మొత్తం భక్తజన సందోహంతో కిటకిటలాడే ఈ ఆలయంలో అమ్మవారు స్వయంభువుగా ఓ శిలలో కొలువుదీరి కనిపించడం విశేషం.

విశాలమైన ఆవరణలో, సుందరమైన నిర్మాణంతో కనిపిస్తూ ఆకట్టుకుంటుంది బండె/బండి మహంకాళి ఆలయం. బెంగళూరులో ఉండే ఈ ఆలయంలో అమ్మవారు విగ్రహ రూపంలో కాకుండా ఒక శిలలోనే చెక్కినట్లుగా కనిపిస్తూ అనుగ్రహిస్తుంది. ఆ రూపానికే అభిషేకాలూ, పూజలూ, అలంకారాలూ చేస్తారు అర్చకులు. చిరునవ్వులు చిందిస్తూ అభయ-వరద ముద్రలతో, శంఖు-చక్రాలను దాల్చి చతుర్భుజిగా దర్శనమిచ్చే ఈ జగజ్జననిని పూజించే భక్తులు తమ కోర్కెలను విన్నవించుకుని అవి తీరాక శక్తికొలదీ చీర-సారె అర్పించి మొక్కులు చెల్లించుకుంటారు. అమ్మకు ఇష్టమైన ఆషాఢ, శ్రావణ మాసాల్లో చుట్టుపక్కల ప్రాంతాల నుంచి వేల సంఖ్యలో భక్తులు ఆలయానికి చేరుకుని పూజలు నిర్వహించి పునీతులవుతారు. ఈ ఆలయ నిర్మాణం ఎలా జరిగిందంటే...

స్థలపురాణం

చరిత్ర ప్రకారం ఈ ఆలయం సుమారుగా పన్నెండువందల సంవత్సరాల నుంచి ఉందని అర్చకులు చెబుతారు. ఒకప్పుడు ఈ ప్రాంతమంతా కొండగుట్టలతో పొడవాటి చెట్లతో ఉండి అడవిని తలపించేదట. చుట్టుపక్కల గ్రామస్థులు తమ పశువుల్ని ఈ అడవికే తీసుకొచ్చేవారట. అలా ఓ యువతి గొర్రెలను తీసుకొచ్చి కాస్తున్నప్పుడు అమ్మవారు తన ఉనికిని తెలియజేసి, ఆలయాన్ని నిర్మించమంటూ ఆదేశించింది. ఆ మాటల్ని పట్టించుకోని ఆమె తన గొర్రెలను తీసుకుని వెళ్లిపోయిందట. ఇలా రెండుమూడు రోజులు వరుసగా దేవి మాటలు ఆకాశవాణి రూపంలో వినిపించడంతో విషయాన్ని గ్రామస్థులకు చెప్పింది. దాంతో వాళ్లు వచ్చి వెతగ్గా ఓ శిలలో అమ్మవారి రూపం కనిపించడంతో అప్పటి నుంచీ పూజలు చేయడం మొదలుపెట్టారు. కాలక్రమంలో ఇక్కడే ఆలయాన్ని నిర్మించారనీ తరత్తర్వాత అభివృద్ధి చేశారనీ కథనం.

కోరిక చెప్పి తాళం వేస్తారు...

అమ్మవారికి నిమ్మకాయల దండలు వేయడం మామూలే. ఇక్కడ కొలువైన శక్తిస్వరూపిణికి ఆ దండలు వేయడంతోపాటు.. నిమ్మ దీపాలను వెలిగించి వాటిని అమ్మవారికి చూపిస్తారు. ఆలయ ప్రాంగణంలోకి వచ్చే భక్తులు శక్తిస్తంభం దగ్గరున్న త్రిశూలానికి నిమ్మకాయల్ని గుచ్చుతారు. ఇలా చేయడం వల్ల తమపైన ఉన్న దిష్టిదోషాలు పోతాయని విశ్వసిస్తారు. ఆ తరువాత అమ్మవారికి తమ కోర్కెను విన్నవించుకుని అక్కడే ఉన్న జాలీలాంటిదానికి తాళాలు వేయడాన్ని చూడొచ్చు. అలా తాళం వేయడం వల్ల అమ్మవారు భక్తుల కోర్కెలను గుర్తుపెట్టుకుని మరీ నెరవేరుస్తుందని ఓ నమ్మకం. ఇవన్నీ దాటి ముందుకెళ్లేకొద్దీ గర్భగుడికి ఎదురుగా ఏనుగు ఆకారంలో ఉన్న శిల కనిపిస్తుంది. దేవి దర్శనానంతరం... పరమేశ్వరుడినీ, వినాయకుడినీ, సుబ్రహ్మణ్యేశ్వరుడినీ, నవగ్రహాలనీ, ఇతర గ్రామదేవతలనీ పూజించి తరిస్తారు. ఉపాధి, వ్యాపార వ్యవహారాలు, వివాహం కావడంలో ఆటంకాలున్నవారు ఈ అమ్మవారిని పూజిస్తే సత్వర ఫలితం లభిస్తుందని చెబుతారు ఆలయాన్ని తరచూ దర్శించుకునే భక్తులు. ఇక, ఇక్కడ, రోజువారీ చేసే పూజలతోపాటు నవరాత్రుల సమయంలో నిర్వహించే బొమ్మల కొలువునూ చూసి తీరాల్సిందే. అలాగే ఆ సమయంలో రోజుకో రూపంలో అమ్మవారికి చేసే అలంకారాన్ని చూసేందుకు రెండు కళ్లూ చాలవు. పౌర్ణమి- అమావాస్య రోజుల్లో... ఆషాఢ-శ్రావణ మాసాల్లో విశేషంగా పూజలు నిర్వహించే ఈ క్షేత్రానికి రావాలంటే అమ్మవారి ఆజ్ఞ ఉండాలని అంటారు.

ఎలా చేరుకోవచ్చు

ఈ ఆలయం... బెంగళూరు గుట్టహళ్ళిలోని కెంపెగౌడ నగర్‌లో ఉంటుంది. బెంగళూరు వరకూ విమానంలో చేరుకుంటే ఆలయానికి దాదాపు గంటలో వెళ్ళొచ్చు. అదే రైల్లో రావాలనుకునేవారు బెంగళూరు కె.ఎస్‌.ఆర్‌. రైల్వేస్టేషన్‌లో దిగితే అక్కడి నుంచి ఆలయానికి చేరుకునేందుకు బస్సులూ ఆటోలూ అందుబాటులో ఉంటాయి.