Breaking | Feedback | ePratibha | E-PAPER | Pratibha

రామోజీరావు సంస్మరణ సభ.. లైవ్‌ అప్‌డేట్స్‌

పత్రికా రంగంతో పాటు వివిధ రంగాల్లో రామోజీ గ్రూపు సంస్థల ఛైర్మన్‌ రామోజీరావు అందించిన సేవలకు గానూ సంస్మరణ సభను ఏపీ ప్రభుత్వం నిర్వహిస్తోంది.

Updated : 27 Jun 2024 15:38 IST

27/06/2024 18:31(IST)

అమరావతిలో రామోజీ విజ్ఞాన కేంద్రం ఏర్పాటు చేస్తాం: సీఎం చంద్రబాబు

హైదరాబాద్‌ అభివృద్ధిలో రామోజీరావు పాత్ర ఎంతో ఉంది.
నవ్యాంధ్రకు ఏ పేరు పెట్టాలా? అన్న ఆలోచన ఉన్న సమయంలో రీసెర్చ్‌ చేసి, ‘అమరావతి’ పేరును రామోజీరావు సూచించారు
ఐదేళ్ల పాటు ఇబ్బందులు ఎదుర్కొన్నా ఇక నుంచి అమరావతి దశ, దిశ మారుతుంది
తెలుగు జాతి ఉజ్వల భవిష్యత్‌కు నాంది పలుకుతుంది
నమ్మిన సిద్ధాంతం కోసం పనిచేసిన వ్యక్తి రామోజీరావు
పనిచేస్తూ చనిపోవాలని ఆయన కోరుకున్నారు. చివరి రోజుల్లో అదే జరిగింది.
తెలుగు భాష, తెలుగు జాతి అంటే ఆయనకు ఎనలేని ఆప్యాయత.
తెలుగుజాతికి ఆయన చేసిన సేవలకు గానూ తగిన గుర్తింపు రావాలి. ఎన్టీఆర్‌, రామోజీరావులకు భారతరత్న సాధించడం మన బాధ్యత
రామోజీరావు ప్రజల ఆస్తి. ఆయన స్థాపించిన వ్యవస్థలను భావితరాలకు అందించాలి.
ఎన్టీఆర్‌, రామోజీరావు ఇద్దరూ యుగపురుషులు.
అమరావతిలో రామోజీ విజ్ఞాన కేంద్రం ఏర్పాటు చేస్తాం
రాష్ట్రంలో ఒక రోడ్డుకు రామోజీ మార్గం అని పేరు పెడతాం
విశాఖలో రామోజీ చిత్రనగరి అని ఏర్పాటు చేస్తాం.

27/06/2024 18:05(IST)

రామోజీ ఆశయాలను ముందుకు తీసుకెళ్లే సంకల్ప సభ ఇది: ఈనాడు ఎండీ సీహెచ్‌ కిరణ్‌

ప్రజా శ్రేయస్సు కోసం, ప్రజాస్వామ్య విలువల పరిరక్షణ కోసం జీవితాంతం పరితపించిన వ్యక్తి రామోజీరావు
ఈ సభను ఏర్పాటు చేసినందుకు ఆంధ్రప్రదేశ్‌ ప్రభుత్వానికి ధన్యవాదాలు
ఈ సభ నాన్నగారి ఆలోచనలు, ఆశయాలను ముందుకు తీసుకెళ్లే సంకల్ప సభగా భావిస్తున్నాం.
ఆయన ఎప్పుడూ ప్రచారాన్ని ఇష్టపడేవారు కాదు
మనం చేసే పనులు ప్రజలకు ఉపయోగపడేవా? కాదా? అని చూడమనేవారు
ప్రజాస్వామ్యం ప్రమాదంలో పడినప్పుడు ఆయన ముందుండేవారు
ప్రజలకు ఇబ్బందులు కలిగినప్పుడు రక్షా కవచంగా నిలిచేవారు
ఎక్కడ విపత్తులు వచ్చినా ఆదుకునేందుకు సిద్ధంగా ఉండేవారు
నాన్నగారి స్ఫూర్తితో ప్రజాసంక్షేమం కోసం కట్టుబడి ఉంటామని మాటిస్తున్నాం
నవ్యాంధ్ర రాజధాని పేరును అమరావతిగా నాన్నగారే సూచించారు
అమరావతి దేశంలోనే గొప్ప నగరంగా మారాలి
అమరావతి నిర్మాణానికి రూ.10కోట్లు విరాళం ప్రకటిస్తున్నాం..: ఈనాడు ఎండీ సీహెచ్‌ కిరణ్‌

27/06/2024 18:22(IST)

ఈనాడు ప్రజాచైతన్యం కోసం పనిచేస్తోంది: ఏపీ సీఎం చంద్రబాబు

ప్రజా సమస్యలపై నిరంతరం పోరాటం చేసిన వ్యక్తి రామోజీరావు
జిల్లా ఎడిషన్లు తెచ్చి క్షేత్రస్థాయి ప్రజా సమస్యలు ప్రస్తావించారు
నటులు, జర్నలిస్టులు, కళాకారులకు జీవితం ఇచ్చారు
ప్రియా పచ్చళ్లను 150 దేశాలకు ఎగుమతి చేశారు
రామోజీ ఫిల్మ్‌సిటీని అద్భుతంగా తీర్చిదిద్దారు
కొవిడ్‌ వచ్చినప్పుడు ప్రజలకు అండగా ఉన్నారు
ప్రజా సమస్యలపై నిరంతరం పోరాటం చేసిన వ్యక్తి రామోజీరావు.. ఏపీ సీఎం చంద్రబాబు

27/06/2024 18:12(IST)

ఒకే ఒక ఎన్టీఆర్‌.. ఒకే ఒక రామోజీ: చంద్రబాబు

రామోజీరావు అక్షర శిఖరం
సంస్మరణ సభకు వచ్చిన వారందరికీ ధన్యవాదాలు
రామోజీరావు ఇచ్చిన స్ఫూర్తిని గుర్తు పెట్టుకుని, ముందు తరాలకు అందించాలి
అచంచలమైన విశ్వాసంతో ఎదిగిన వ్యక్తికి గొప్ప ఉదాహరణ రామోజీరావు
ఒకే ఒక ఎన్టీఆర్‌.. ఒకే ఒక రామోజీ మాత్రమే ఉంటారు
ప్రజాస్వామ్యాన్ని కాపాడటం కోసం పోరాటం చేసిన యోధుడు రామోజీరావు
ఆయన మీడియాకు చేసిన కృషిగానూ అనేక అవార్డులు వచ్చాయి
ఎంచుకున్న ప్రతి రంగంలోనూ నెంబర్‌ వన్‌గా ఎదిగారు
నీతి, నిజాయతీకి ప్రతిరూపం రామోజీరావు
ఏ పనిచేసినా ప్రజాహితం కోరుకునేవారు
మార్గదర్శి స్థాపించి 62ఏళ్లు దాటింది. ఎన్నో ప్రభుత్వాలు అడ్డంకులు సృష్టించాలని చూశాయి. అయినా ఖాతాదారులందరూ రామోజీరావు పక్షాన నిలిచారు.

27/06/2024 17:54(IST)

రామోజీరావు ప్రజల పక్షపాతి: డిప్యూటీ సీఎం పవన్‌కల్యాణ్‌

సినిమాలు చేస్తున్నప్పుడు ఆయన్ను కలవలేదు
రాజకీయాల్లోకి వచ్చాకే 2008లో రామోజీరావును కలిశాను.
ఆయన మాట్లాడే విధానం నన్ను ఎంతో ఆకర్షించింది
జర్నలిస్టిక్‌ విలువలు కాపాడటానికే ఆయన ఉన్నారనిపించింది.
పత్రికా స్వేచ్ఛ ఎంత అవసరమో ఆయన వివరించారు
ప్రజా సమస్యలపై రాజీలేని పోరాటం చేశారు
రామోజీరావు స్ఫూర్తిమంతమైన జర్నలిస్ట్‌
రామోజీరావుకు తప్పకుండా విగ్రహం పెట్టాలి
ఎన్ని కష్టాలు వచ్చినా, తన విలువలను వదులుకోలేదు. అందుకు చాలా సాహసం కావాలి.
ప్రజాస్వామ్యాన్ని పరిరక్షించడానికి ఎవరి స్థాయిలో వాళ్లు ప్రయత్నించాలన్న విషయం రామోజీరావు నుంచి నేర్చుకోవాలి
పార్టీలు, రాజకీయాలకు అతీతంగా ఈటీవీ, ఈనాడు వార్తలు ఉంటాయి: డిప్యూటీ సీఎం పవన్‌కల్యాణ్‌

27/06/2024 17:49(IST)

రామోజీరావు జీవితం స్ఫూర్తిదాయకం: మంత్రి పార్థసారథి

ఏ రంగంలో అడుగు పెట్టినా రామోజీరావు ఉన్నత శిఖరాలను అధిరోహించారు
ఈనాడుకు విశ్వసనీయత తీసుకొచ్చిన గొప్ప వ్యక్తి రామోజీరావు
సాధారణ కుటుంబంలో పుట్టినా క్రమశిక్షణ, నిజాయతీ, కృషి ఉంటే ఉన్నత స్థానాలకు వెళ్లగలరని నిరూపించిన వ్యక్తి రామోజీరావు
ప్రజాస్వామ్యానికి ఆపద వచ్చినప్పుడు కలాన్ని ఆయుధంగా చేసుకుని పోరాటం చేశారు
కష్టాలు చాలా మందికి వస్తాయి. నిజాయతీ పోరాటం చేయడం నేర్చుకోవాలి.
ఆయన కుటుంబ సభ్యులు కూడా ఎంతో క్రమశిక్షణతో ముందుకు సాగుతున్నారు..: ఏపీ సమాచారశాఖ మంత్రి పార్థసారథి

27/06/2024 17:41(IST)

బతికినా, చనిపోయినా రామోజీరావులానే ఉండాలి: సంగీత దర్శకుడు ఎం.ఎం.కీరవాణి

రామోజీరావు వద్ద ఎన్నో విషయాలు నేర్చుకున్నా.
సంగీత దర్శకుడిగా ఆయన నాకు జన్మ ఇచ్చారు.
రామోజీరావులా ఒక్కరోజు జీవించినా చాలు అని ఒక సభలో నేను అన్నాను.
మరణించిన ఆయనలా చనిపోవాలి. ఎందుకంటే కురుక్షేత్ర సంగ్రామంలో భీష్ముడు ఉత్తరాయణ పుణ్యకాలం వచ్చే వరకూ తన మరణాన్ని ఆపారు. అదేవిధంగా తాను ఎంతో ప్రేమించే ఆంధ్రప్రదేశ్‌ను కబంధ హస్తాల నుంచి బయటపడటం చూసి అప్పుడు నిష్క్రమించారు.
ఆయన ఫొటో మా పూజ గదిలో ఉంటుంది. దేవుడు అంటే నమ్మని ఆయన ఫొటో దేవుడు ఉండాల్సిన చోట ఉంటుంది.
ఎంతోమంది జీవితాల్లో వెలుగును నింపిన ఆయన స్ఫూర్తి నా గుండెల్లో చిరకాలం ఉంటుంది.. ఆస్కార్‌ అవార్డు గ్రహీత, సంగీత దర్శకుడు ఎం.ఎం.కీరవాణి

27/06/2024 17:38(IST)

రామోజీరావుకు భారతరత్న ఇవ్వాలి: ఎస్‌.ఎస్‌.రాజమౌళి

రామోజీరావు తన జీవితంలో ఎన్నో శిఖరాలు అధిరోహించారు
తెలుగు ప్రజలకు ఇంత చేసిన ఆయనకు మనమేం చేయగలం?
రామోజీరావుకు భారతరత్న ఇవ్వడం సముచితం, సబబు
ఆయనకు భారతరత్న ఇవ్వాలని కేంద్రాన్ని కోరుతున్నాను: ఎస్‌.ఎస్‌.రాజమౌళి

27/06/2024 17:34(IST)

రామోజీరావు గొప్ప మానవతా వాది: నిర్మాత శ్యామ్‌ ప్రసాద్‌రెడ్డి

రామోజీరావుతో మా నాన్నకు చాలా సాన్నిహిత్యం ఉంది
జీవితంలో తెలివికన్నా కూడా కష్టపడే తత్వం ముఖ్యమని మా అమ్మాయితో అన్నారు
తెలివిగల వాళ్లు ఎప్పుడైనా ఫెయిల్‌ అయినా, కష్టపడేవాళ్లు నష్టపోయిన దాఖలాలులేవని చెబుతూ మా అమ్మాయిని దీవించారు.
ఏ పని అయినా కష్టాన్ని ఇష్టంగా చేయమనేవారు
సాధారణ రైతు కుటుంబంలో పుట్టి తన జీవితాన్ని తానే రాసుకున్నారు
కఠోరమైన క్రమశిక్షణతో ఒక్కో మెట్టు ఎక్కారు.
రామోజీరావు గొప్ప మానవతావాది. ఆయన నీడలో 40వేల కుటుంబాలు బతుకుతున్నాయి ఇలాంటివి ప్రభుత్వాలు మాత్రమే చేస్తాయి.
వేల మందికి ఉపాధి కల్పించి వాళ్ల బాగోగులు చూసుకున్నారు.
సమాజంలో మార్పు కోసం కలాన్ని ఆయుధంగా చేసుకుని జీవితకాల పోరాటం చేశారు: సినీ నిర్మాత శ్యామ్‌ ప్రసాద్‌రెడ్డి

27/06/2024 17:27(IST)

ప్రజల సమస్యలపై రామోజీ కలం కదిలించారు: గులాబ్‌ కొఠారి

రామోజీరావుతో నాకు 40 ఏళ్లుగా పరిచయం ఉంది
ఆయన ప్రజల సమస్యలపై కలం కదిలించారు
సమాజంలో అనేక రంగాల్లో తనదైన ముద్రవేశారు
రామోజీరావు సంస్కృతి, సంప్రదాయాలకు ఎక్కువ విలువ ఇచ్చేవారు
ఎప్పుడూ ప్రజా సమస్యల గురించే ఆలోచించేవారు: రాజస్థాన్‌ పత్రిక ఎడిటర్‌ గులాబ్‌ కొఠారి

27/06/2024 17:24(IST)

చనిపోయినా మన మధ్యే బతికి ఉన్న గొప్ప వ్యక్తి రామోజీరావు: మురళీమోహన్‌

కృషి, దీక్ష, పట్టుదల ఉంటే ఏదైనా సాధించవచ్చని రామోజీరావు నిరూపించారు
రైతు కుటుంబం నుంచి వచ్చి అనేక రంగాల్లో రాణించారు
రామోజీరావు.. సినీరంగం అభివృద్ధికి ఎంతో కృషి చేశారు
అన్నదాత ద్వారా రైతులకు గొప్ప సమాచారం ఇచ్చేవారు
సమాజాన్ని జాగృతం చేసే చిత్రాలు తీయాలని ఎప్పుడూ అనేవారు
ఎంతో మంది చిన్న నటీనటులకు అవకాశాలు ఇచ్చారు
చనిపోయిన తర్వాత కూడా మన మధ్య బతికి ఉండే గొప్ప వ్యక్తి రామోజీరావు: సినీ నటుడు మురళీమోహన్‌

27/06/2024 17:19(IST)

నమ్మిన విలువుల కోసం కట్టుబడే వ్యక్తి రామోజీరావు: ఎన్‌.రామ్‌

రామోజీరావుతో నాకు వ్యక్తిగత పరిచయం ఉంది
ఎడిటర్స్‌ గిల్డ్‌ అధ్యక్షుడిగా ఆయన ఉన్నప్పుడు ఆ పరిచయం ఏర్పడింది
రామోజీరావు.. ఇన్వెస్టిగేటివ్‌ జర్నలిజాన్ని నమ్మేవారు
అప్పట్లో దేశ రాజకీయాలు చాలా ఆసక్తికరంగా ఉండేవి
రాజీవ్‌ ప్రభుత్వం తెచ్చిన పరువునష్టం బిల్లులో కఠిన నిబంధనలు పెట్టారు
పాత్రికేయులే లక్ష్యంగా కఠిన నిబంధనలు రూపొందించారు.
పరువునష్టం బిల్లుపై ఎడిటర్స్‌ గిల్డ్‌ అధ్యక్షుడిగా రామోజీ పోరాడారు
ఆయన పోరాటం ఫలితంగా ఆ బిల్లును వెనక్కి తీసుకున్నారు
ఈనాడు పత్రిక సమాజంలోని క్షేత్రస్థాయి పరిస్థితులకు అద్దం పట్టింది
ఈనాడు ప్రస్థానంపై ఆస్ట్రేలియన్‌ రాజకీయవేత్త రాబిన్‌ జెఫ్రీ పుస్తకం రాశారు: ఎన్‌.రామ్‌.. పద్మభూషణ్‌ అవార్డు గ్రహీత, మాజీ ఎడిటర్‌ ఇన్‌ చీఫ్‌, ఎండీ ది హిందూ

27/06/2024 17:10(IST)

రామోజీరావు ఒక ఎన్‌సైక్లోపిడియా: సినీ నటి జయసుధ

రామోజీరావు సంస్మరణ సభలో పాల్గొనడం నాకు దక్కిన అదృష్టం
రామోజీరావు ఒక ఎన్‌సైక్లోపిడియా.
క్రమశిక్షణతో ఆయన ఎదగడమే కాకుండా తన పక్కనున్న వారిని కూడా పైకి తీసుకొచ్చారు.
చిత్ర పరిశ్రమలో ఎంతోమందికి సెకండ్‌ ఇన్నింగ్స్‌ ఆయన వల్లే సాధ్యమైంది.
ఆయన నిర్మించిన సినిమాల్లో నేను నటించడం అదృష్టం: సినీ నటి జయసుధ

27/06/2024 17:06(IST)

రామోజీరావు అమరజీవి: మంత్రి కొల్లు రవీంద్ర

రామోజీరావుకు నివాళి అర్పించడం మనందరి బాధ్యత.
ఈనాడు ప్రారంభించి తెలుగు ప్రజల కోసం 50ఏళ్లు అవిరామ కృషి చేసిన వ్యక్తి.
పత్రికారంగంలో విప్లవాత్మక మార్పులకు నాంది పలికారు.
ఆసియా ఖండంలోనే అతి పెద్ద ఫిల్మ్‌ సిటీ రామోజీ ఫిల్మ్‌సిటీని నిర్మించారు.
తెలుగు వారికి ఎప్పుడు కష్టాలు వచ్చినా అండగా నిలబడ్డారు.
ఆనాడు ఎన్టీఆర్‌ రాజకీయాల్లో చైతన్య తీసుకువచ్చేందుకు ముందుకు వస్తే, ఆయనకు అండగా నిలబడ్డారు
అనేక కష్టాలు, ఇబ్బందులు రాజకీయాలతో జత కట్టాలని చూసినా మచ్చలేకుండా నిలబడిన వ్యక్తి రామోజీరావు
అక్షరాన్ని ఆయుధాన్ని చేసిన వ్యక్తి.
ఏపీ ప్రజలు పడుతున్న కష్టాలను గమనించి, ప్రజల కళ్లలో ఆనందాన్ని చూసి మనల్ని వీడిన రామోజీరావు అమరజీవి: - ఏపీ ఎక్సైజ్‌శాఖ మంత్రి కొల్లు రవీంద్ర

27/06/2024 15:29(IST)

విజయవాడకు ప్రముఖులు

రామోజీ గ్రూప్ సంస్థల ఛైర్మన్‌ రామోజీరావు సంస్మరణ సభకు హాజరయ్యేందుకు ప్రముఖులు తరలివచ్చారు. మార్గదర్శి ఎండీ శైలజాకిరణ్, సినీ ప్రముఖులు రాఘవేంద్రరావు, దగ్గుబాటి సురేశ్‌బాబు, మురళీమోహన్, జయసుధ, యాంకర్ ఝాన్సీతో పాటు రాజస్థాన్ పత్రిక ఎడిటర్ గులాబ్ కొఠారి గన్నవరం విమానాశ్రయానికి చేరుకున్నారు. ప్రభుత్వ అధికారులు వారికి స్వాగతం పలికారు.

27/06/2024 15:27(IST)

అతిథులు వీరే..

సంస్మరణ సభకు అతిథులుగా ముఖ్యమంత్రి చంద్రబాబునాయుడు, ఉపముఖ్యమంత్రి పవన్‌కల్యాణ్, కేంద్ర రైల్వే, సమాచార ప్రసారాల శాఖ మంత్రి అశ్వినీ వైష్ణవ్, ప్రముఖ పాత్రికేయులు ఎన్‌.రామ్, శేఖర్‌ గుప్తా, గులాబ్‌ కొఠారి, భాజపా రాష్ట్ర అధ్యక్షురాలు దగ్గుబాటి పురందేశ్వరి తదితరులు హాజరుకానున్నారు.

27/06/2024 15:27(IST)

ఆంధ్రప్రదేశ్‌ ప్రభుత్వ ఆధ్వర్యంలో సంస్మరణ సభ

రామోజీ గ్రూపు సంస్థల ఛైర్మన్, పద్మవిభూషణ్‌ అవార్డు గ్రహీత రామోజీరావు సంస్మరణ సభకు రాష్ట్ర ప్రభుత్వం ప్రతిష్ఠాత్మక ఏర్పాట్లు చేసింది. విజయవాడ శివారు కానూరు వందడుగుల రోడ్డులోని అనుమోలు గార్డెన్స్‌లో గురువారం సాయంత్రం నాలుగు గంటలకు ఈ సభ జరగనుంది. పత్రికా రంగంతోపాటు వివిధ రంగాల్లో రామోజీరావు అందించిన విశేష సేవలకు గుర్తింపుగా ఆయన సంస్మరణ సభను రాష్ట్ర ప్రభుత్వం నిర్వహిస్తోంది.