kalanjali_200
Comments
0
Recommend
0
Views
482
ఖైదీలను గౌరవంగా చూడాలి: సుప్రీం కోర్టు
దిల్లీ: దేశంలోని కారాగారాల్లో ఖైదీల సంఖ్య అంతకంతకూ పెరిగిపోవడంపై సుప్రీం కోర్టు శుక్రవారం ఆందోళన వ్యక్తంచేసింది. ఈ పోకడను కట్టడి చేయడానికి తాను అనేక ఆదేశాలు జారీ చేసినప్పటికీ పరిస్థితి మెరుగుపడలేదని ఆక్షేపించింది. ఖైదీలను మర్యాదగా చూడాల్సిన అవసరం ఉందని పేర్కొంది. ‘‘వివిధ పిటిషన్లకు సంబంధించి ఈ కోర్టు తరచూ అనేక ఆదేశాలను జారీ చేసినప్పటికీ ఏదో కారణంపై జైళ్లలో మితిమీరిన రద్దీ కొనసాగుతూనే ఉంది’’ అని జస్టిస్‌ ఎం.బి.లోకుర్‌, జస్టిస్‌ ఆర్‌.కె.అగర్వాల్‌తో కూడిన సామాజిక న్యాయ ధర్మాసనం వ్యాఖ్యానించింది. 2014 డిసెంబర్‌ 31 నాటి కారాగార గణాంకాలను బట్టి చూస్తే ఈ పరిస్థితి స్పష్టమవుతోందని పేర్కొంది. ప్రభుత్వం అనేక హామీలు ఇచ్చినప్పటికీ వాస్తవ పరిస్థితిలో మార్పు లేదని వ్యాఖ్యానించింది. ‘‘మిగతా మానవుల్లానే ఖైదీలను మర్యాదగా చూడాలి’’ అని పేర్కొంది. దాద్రా, నగర్‌ హవేలీ జైల్లో గరిష్ఠంగా 331.7 శాతం మేర రద్దీ అధికంగా ఉందని, తర్వాతి స్థానాల్లో ఛత్తీస్‌గఢ్‌ (258.9 శాతం), దిల్లీ (221.6 శాతం) ఆక్రమించాయని వివరించింది. కారాగారాల సంస్కరణకు అనేక ఆదేశాలను జారీ చేసింది. పరిశీలన గృహాల్లో ఉన్న బాల నేరస్తుల స్థితిగతులను పరిగణనలోకి తీసుకొని ఒక కారాగార నియమావళిని తయారు చేయాలని మహిళా, శిశు సంక్షేమ శాఖను ఆదేశించింది. విచారణలో ఉన్న ఖైదీలపై ఏర్పాటైన కమిటీలు ప్రతి జిల్లాలోనూ మూడు నెలలకోసారి సమావేశం కావాలని సూచించింది. సాధ్యమైనంత త్వరగా వారు విడుదలయ్యేలా చూడాలని పేర్కొంది. పేదరికం కారణంగా బెయిలు బాండులను సమర్పించలేనివారిని.. ఆ కారణంతో నిర్బంధంలో ఉంచకుండా చూడాలని స్పష్టంచేసింది. మొదటిసారి నేర చేసినవారు సమాజంలో పునరావాసం పొందేలా కూడా కమిటీ చూడాలంది.
Your Rating:
-
Overall Rating:
0