kalanjali_200
Comments
0
Recommend
0
Views
400
పార్టీ బహిష్కరణతో.. ఎంపీ, ఎమ్మెల్యేలు అనర్హులు కాబోరు: కేంద్రం
దిల్లీ: ఒక ఎంపీగానీ, ఎమ్మెల్యేగానీ తన పార్టీ నుంచి బహిష్కరణకు గురైనంత మాత్రాన ఎంపీ/ఎమ్మెల్యే పదవికి అనర్హులు కాబోరని కేంద్రప్రభుత్వం పేర్కొంది. అయితే.. సదరు ఎంపీ/ఎమ్మెల్యేపై స్పీకర్‌ చర్య తీసుకోవచ్చని తెలిపింది. పార్టీ ఫిరాయింపుల చట్టంపై గతంలో ఇచ్చిన తీర్పును సమీక్షించాలని కోరుతూ దాఖలైన పిటిషన్‌ మీద విచారణ జరుపుతున్న సుప్రీంకోర్టు ధర్మాసనానికి కేంద్రం ఈ అభిప్రాయాన్ని తెలియజేసింది. కేంద్రం తరఫున అదనపు సొలిసిటర్‌ జనరల్‌ పీఎస్‌నరసింహ శుక్రవారం వాదనలు వినిపించారు. పార్టీ నుంచి బహిష్కరణకు గురైన ఎంపీ/ఎమ్మెల్యే స్పీకర్‌ నిర్ణయం ప్రకారం చట్టసభలో సభ్యుడిగా కొనసాగుతారని తెలిపారు. అయితే.. సదరు ప్రజాప్రతినిధి ఇతర రాజకీయపార్టీలో చేరినా, తన ‘సొంత’పార్టీ విప్‌ను ధిక్కరించినా స్పీకర్‌ చర్య తీసుకునే అవకాశం రాజ్యాంగంలోని 10వ షెడ్యూల్‌ ప్రకారం ఉంటుందని పేర్కొన్నారు. సమాజ్‌వాదీపార్టీ నుంచి బహిష్కరణకు గురైన ఎంపీలు అమర్‌సింగ్‌, జయప్రద దాఖలు చేసిన పిటిషన్‌పై సుప్రీంకోర్టు విచారణ జరుపుతోంది.
Your Rating:
-
Overall Rating:
0