Eenadu Ruchulu
తీపి తీపి.. దీపావళి
చిన్నారులకు సీమటపాకాయలు, సిసింద్రీలే ఆనందం. ఇంటి లోగిళ్లకు చిరు దీపాల వెలుగులే అందం. ఇంటిల్లిపాదికీ నోరూరించే మిఠాయిలే పర్వదిన పరమానందం. శ్రీ మహాలక్ష్మిని భక్తి శ్రద్ధలతో పూజించే దివ్వెల పండగ రోజున కమ్మని మిఠాయిలతో ఎంతో వేడుక. సంప్రదాయ రుచులకు దీటుగా ఈ తీపి రుచులనూ ప్రయత్నించండి.
పాన్‌ పేటా
కావలసినవి సందేశ్‌కోసం: కోవా: ఒకటింపావు కప్పులు, పంచదారపొడి: పావుకప్పు, పిస్తాపప్పులు: 2 టేబుల్‌స్పూన్లు(చిన్నముక్కలుగా కోయాలి), కుంకుమపువ్వు: కొద్దిగా, యాలకులపొడి: పావుటీస్పూను

పాన్‌ కోసం: బూడిదగుమ్మడికాయ లేదా తెల్ల గుమ్మడికాయ: కిలో, పటిక: చిన్నముక్క, పంచదార: మూడున్నర కప్పులు, మంచినీళ్లు: సరిపడా, లవంగాలు: గుచ్చేందుకు సరిపడా, ఫుడ్‌కలర్‌: ఆకుపచ్చ లేదా మిఠాయిరంగు

తయారుచేసే విధానం
* కోవాను మృదువుగా కలపాలి. తరవాత పంచదార పొడి వేసి కలపాలి. ఈ మిశ్రమాన్ని ఓ బాణలిలో వేసి తక్కువ మంటమీద కలుపుతూ ఉడికించాలి. మిశ్రమం చిక్కగా అయిన తరవాత యాలకులపొడి, కుంకుమపువ్వు, పిస్తాపప్పులు వేసి కలిపి ఉంచాలి.

* బూడిదగుమ్మడికాయ లేదా తెల్ల గుమ్మడికాయ పైన పొట్టు, లోపలి గింజలు, పీచు తీసి ముక్కలుగా కోయాలి. ఈ ముక్కలను నీళ్లలో వేయాలి. పటిక కూడా వేసి రెండు గంటలు నాననివ్వాలి. తరవాత మళ్లీ మంచినీళ్లతో రెండుమూడుసార్లు కడగాలి.

* ఇప్పుడు ఓ గిన్నెలో నీళ్లు మరిగించి అందులో బూడిదగుమ్మడికాయ ముక్కలు వేసి ఐదు నిమిషాలు ఉడికించి దించి నీళ్లు వంపేయాలి.

* మరో గిన్నె తీసుకుని అందులో పంచదార వేయాలి. అందులోనే ఉడికించిన ముక్కలువేసి కలిపి అరగంటసేపు నాననివ్వాలి. ముక్కల నుంచి నీళ్లు వూరతాయి. 

* అప్పుడు బాగా మెదిపి, ఈ మిశ్రమాన్ని తక్కువ మంటమీద నీరంతా ఆవిరయ్యేవరకూ ఉడికించాలి. ఇష్టమైన ఫుడ్‌కలర్‌ కూడా కలిపి దించాలి.

* మిశ్రమాన్ని చిన్న ముద్దలుగా చేసుకుని మందపాటి రేకుల్లా వత్తాలి. ఇందులో సందేశ్‌ను కొద్దిగా పెట్టి పాన్‌ ఆకారంలో అంటే త్రికోణాకారంలో మడిచి లవంగం గుచ్చితే పాన్‌ పేటా రెడీ!

స్వీట్‌ డైమండ్స్‌
కావలసినవి మైదా: 2 కప్పులు, పాలు: అరకప్పు, పంచదార: అరకప్పు, నువ్వులు: 2 టేబుల్‌స్పూన్లు, నెయ్యి: 4 టేబుల్‌స్పూన్లు, ఉప్పు: అరటీస్పూను, నూనె లేదా నెయ్యి: వేయించడానికి సరిపడా

తయారుచేసే విధానం
* గోరువెచ్చని పాలలో పంచదార, నెయ్యి వేసి బాగా కలపాలి. ఇప్పుడు ఈ మిశ్రమాన్ని మైదాపిండిలో వేసి బాగా కలపాలి. తరవాత నువ్వులు కూడా వేసి కలపాలి. ఇప్పుడు మిశ్రమాన్ని ఉండలుగా చేయాలి. 

* ఒక్కో ఉండనీ అంగుళం మందం ఉన్న చపాతీల్లా వత్తాలి. తరవాత ఈ చపాతీని చిన్న డైమండ్స్‌లా కోయాలి. బాణలిలో నూనె లేదా నెయ్యి వేసి డైమండ్స్‌లా కోసిన ముక్కలను వేసి వేయించి తీయాలి.

కార్న్‌ హల్వా
కావలసినవి కార్న్‌ఫ్లోర్‌: 100గ్రా., పంచదార: 300గ్రా., నెయ్యి: 5 టేబుల్‌స్పూన్లు, పాలు: 3 టేబుల్‌స్పూన్లు, జీడిపప్పు: పది, బాదం: 8, పిస్తాపప్పులు: 20, యాలకులపొడి: టీస్పూను, ఫుడ్‌కలర్‌: కొద్దిగా

తయారుచేసే విధానం
* కార్న్‌ఫ్లోర్‌లో పాలు, నెయ్యి వేసి బాగా కలపాలి.

* బాణలిలో కొద్దిగా నెయ్యి వేసి జీడిపప్పు వేసి వేయించాలి.

* పంచదారలో తగినన్ని నీళ్లు పోసి తీగపాకం రానివ్వాలి.

* ఇప్పుడు కార్న్‌ఫ్లోర్‌ మిశ్రమం, నచ్చిన ఫుడ్‌కలర్‌ వేసి బాగా కలుపుతూ ఉడికించాలి.

* మిశ్రమం అంచులకు అంటుకోనంత వరకూ ఉడికించాలి. ఇప్పుడు వేయించిన జీడిపప్పు, సన్నగా తరిగిన బాదం, పిస్తా ముక్కలు, యాలకులపొడి వేసి కలిపి నెయ్యి రాసిన ప్లేటులోకి వేసి ఆరిన తరవాత ముక్కలుగా కోసి, బాదంపప్పులు అలంకరిస్తే సరి..

బేసన్‌ లడ్డూ
కావలసినవి
సెనగపిండి: 2 కప్పులు, నెయ్యి: అరకప్పు, పంచదార: కప్పు, బాదం, ఎండుద్రాక్ష: పావుకప్పు, యాలకులపొడి: అరటీస్పూను

తయారుచేసే విధానం
* పంచదారను పొడి చేయాలి. 

* బాణలిలో నెయ్యి, సెనగపిండి వేసి తక్కువమంటమీద మంచి వాసన వచ్చి రంగు మారేవరకూ వేయించాలి. తరవాత దించి పంచదార పొడి, యాలకులపొడి వేసి కలపాలి. సన్నగా తరిగిన బాదం, ఎండుద్రాక్ష కూడా కలిపి లడ్డూల్లా చుట్టాలి.

కేసర్‌ బర్ఫీ
కావలసినవి
కోవా: కప్పు, పంచదార: పావుకప్పు, కుంకుమపువ్వు: కొద్దిగా, పాలు: రెండు టేబుల్‌స్పూన్లు, యాలకులపొడి: అరటీస్పూను, నెయ్యి: టేబుల్‌స్పూను, మిఠాయిరంగు ఫుడ్‌ కలర్‌: చిటికెడు, పిస్తాపప్పులు: సరిపడా

తయారుచేసే విధానం
* కోవాను చిదిమి నాన్‌స్టిక్‌ పాన్‌లో వేయాలి. అందులోనే పంచదార కూడా వేసి కరిగేవరకూ తక్కువ మంటమీద ఉడికించాలి. 

* గోరువెచ్చని పాలల్లో కుంకుమపువ్వు నాననివ్వాలి. తరవాత కోవా మిశ్రమంలో వేసి కలపాలి. మిఠాయిరంగు, యాలకులపొడి కూడా వేసి మరో ఎనిమిది నిమిషాలు తక్కువమంటమీద ఉడికించాలి. మిశ్రమం అంచులకు అతుక్కోకుండా ఉండేంతవరకూ ఉడికించి నెయ్యి రాసిన ప్లేటులో వేసి పిస్తాముక్కలు చల్లి కావలసిన ఆకారంలో కోసుకోవాలి.

కమ్మని డ్రైఫ్రూట్స్‌ ఘుగ్రాస్‌
కావల్సినవి: కోవా - పావుకేజీ, నెయ్యి - రెండు టేబుల్‌స్పూన్లు, చిరోంజి - రెండు చెంచాలు, అన్ని రకాల డ్రైఫ్రూట్స్‌ - కప్పు, మైదా - 200 గ్రా, నూనె - వేయించడానికి సరిపడా, పంచదార పొడి - కప్పు.

తయారీ: ఓ గిన్నెలో మైదా, మూడుటేబుల్‌స్పూన్ల నూనె తీసుకుని సరిపడా నీళ్లతో గట్టి పిండిలా కలిపి కాసేపు నాననివ్వాలి. ఇంతలో పొయ్యిమీద పాన్‌ పెట్టి కోవా, నెయ్యి వేసి తీసుకుని సన్ననిమంటపై ఉంచి కలుపుతూ ఉండాలి. ఇరవై నిమిషాలయ్యాక పొయ్యి కట్టేసి ఈ మిశ్రమాన్ని చల్లారనివ్వాలి.
ఇప్పుడు అన్నిరకాల డ్రైఫ్రూట్స్‌, చిరోంజి తీసుకుని పలుకుల్లా కోసి ఈ మిశ్రమానికి కలపాలి. ఆ తరవాత పంచదార పొడి కూడా చేర్చాలి. ముందుగా కలిపి పెట్టుకున్న మైదా పిండిని చిన్నచిన్న పూరీల్లా చేసి కోవా మిశ్రమాన్ని కొద్దిగా ఉంచి.. అంచులు మూసేయాలి. ఇలా అన్నీ చేసుకున్న వాటన్నింటినీ కాగుతున్న నూనెలో వేసి సన్ననిమంటపై లేత బంగారువర్ణంలోకి వచ్చేదాకా వేయించి దింపేస్తే సరిపోతుంది.

నోరూరించే పెసర, కోవా స్వీటు
కావల్సినవి: పంచదార - 200 గ్రా, పెసరపప్పు - పావుకేజీ, పాలు - పావు లీటరు, కోవా - అరకప్పు, కేసరి రంగు - కొద్దిగా, జీడిపప్పు, ఎండుద్రాక్ష, బాదం - అన్నీ కలిపి పావుకప్పు, యాలకులపొడి - అరచెంచా, నెయ్యి - వంద గ్రా, కుంకుమపువ్వు - కొద్దిగా.
తయారీ: బాదంపప్పును నానబెట్టి పొట్టు తీసి రెండుగా చేసుకోవాలి. జీడిపప్పు, ఎండుద్రాక్షను వేయించి పెట్టుకోవాలి. నానబెట్టిన పెసరపప్పును ఉడికించి ఆ తరవాత మెత్తగా రుబ్బుకోవాలి. పొయ్యిమీద గిన్నెపెట్టి నెయ్యిని కరిగించి అందులో రుబ్బిపెట్టుకున్న పెసర మిశ్రమం, పాలు, పంచదార ఒకదాని తరవాత ఒకటి వేసి బాగా కలపాలి. ఈ మిశ్రమం ఉడికాక కోవా కూడా చేర్చి, జీడిపప్పు, యాలకులపొడి, ఎండుద్రాక్ష, మిఠాయిరంగు, కుంకుమపువ్వు వేయాలి. ఐదునిమిషాలయ్యాక పొయ్యికట్టేసి నెయ్యి రాసిన పళ్లెంలో ఈ మిశ్రమాన్ని పరిచి బాదం పలుకులతో అలంకరించాలి. చల్లారాక బిళ్లల్లా కోసుకుంటే చాలు.. పెసర, కోవా స్వీటు సిద్ధమైనట్లే.
పసందైన వెన్న మిఠాయి
కావల్సినవి: మీగడ - అరకప్పు, వెన్న - కప్పు, నువ్వులు - కప్పు (వేయించి పొడిచేయాలి), వెన్న కాచిన తరవాత వచ్చే మిగులు - కప్పు, పాలు - రెండు కప్పులు, ఓట్స్‌ పిండి, వరిపిండి - కప్పు చొప్పున, కోవా, పంచదార - అరకప్పు చొప్పున, బెల్లం - కప్పు, యాలకులపొడి - కొద్దిగా, జీడిపప్పు, ఎండుద్రాక్ష - అలంకరణ కోసం.
తయారీ: వెడల్పాటి పెనం తీసుకుని మీగడ, వెన్న కాచిన మిగులు, బెల్లం, కాసిని పాలు తీసుకుని వేడిచేయాలి. మిశ్రమం చిక్కగా మారినప్పుడే పాకం జిగురుగా వస్తుంది. అప్పుడు వేయించి పొడి చేసుకున్న నువ్వుల పొడి, జీడిపప్పు, ఎండుద్రాక్ష పలుకులు చేర్చాలి. బాగా దగ్గరపడే దాకా కలిపి దింపేయాలి. ఈ మిశ్రమం చల్లారాక చిన్నచిన్న ఉండల్లా చుట్టుకోవాలి. మరో పాన్‌లో మిగిలిన పాలు మరిగించి అందులో ఓట్స్‌పిండి, వరిపిండి చేర్చాలి. పంచదార, కోవా కూడా వేసి బాగా కలిపి దింపేయాలి. చల్లారాక ఈ పాల మిశ్రమాన్ని పూరీల్లా వత్తుకుని మధ్యలో ముందుగా సిద్ధంచేసుకున్న ఉండల్ని ఉంచి చుట్టూ మూసి.. మళ్లీ లడ్డూల్లా చుట్టుకోవాలి. ఇలా చేసుకున్న వాటిని వెన్నలో ముంచి పక్కన పెట్టుకోవాలి. ఐదునిమిషాలు ఫ్రిజ్‌లో ఉంచి.. ఆ తరవాత తింటే చాలా రుచిగా ఉంటాయీ మిఠాయిలు.
వావ్‌ అనిపించే ఖర్జూర రోల్స్‌
కావల్సినవి: ఖర్జూరాలు - అరకేజీ, పాలు - లీటరు, అన్నిరకాల డ్రైఫ్రూట్స్‌ - అరకప్పు, నెయ్యి - రెండు టేబుల్‌స్పూన్లు.
అలంకరణకోసం: కొబ్బరిపొడి, వాల్‌నట్లు.
తయారీ: ఖర్జూరాల్లోని గింజలు తీసేసి చిన్నచిన్న పలుకుల్లా చేసుకోవాలి. పాన్‌లో నెయ్యి కరిగించి ఖర్జూరాలు వేయించాలి. మంట తగ్గించి దాదాపు ఇరవై నిమిషాలు కలుపుతూనే ఉండాలి.
ఖర్జూర పలుకులు మెత్తగా అయ్యాక పాలు చేర్చాలి. ఈ మిశ్రమం చిక్కగా అయ్యేదాకా పొయ్యిమీదే ఉంచాలి. ఆ తరవాత డ్రైఫ్రూట్స్‌ పలుకుల్ని కలిపి దింపేయాలి. వేడి తగ్గాక ఈ మిశ్రమాన్ని రెండు గంటలు ఫ్రిజ్‌లో ఉంచాలి. ఆ తరవాత రోల్స్‌లా చుట్టుకుని కొబ్బరిపొడిలో అద్ది.. వాల్‌నట్స్‌తో అలంకరిస్తే.. కమ్మని ఖర్జూర రోల్స్‌ నోరూరిస్తాయి.
తియతియ్యని కొవ్వొత్తులు
కావల్సినవి: పాలు, పంచదార - రెండు కప్పుల చొప్పున, మొక్కజొన్నపిండి, వరిపిండి, మైదా - అరకప్పు చొప్పున, జీడిపప్పు ముద్ద - పావు కప్పు, నెయ్యి - అరకప్పు, యాలకులపొడి - చెంచా, మిఠాయి రంగులు - రెండుమూడు.
తయారీ: పొయ్యిమీద పాన్‌ పెట్టుకుని పచ్చిపాలు, పంచదార, మైదా వేసుకొని వరిపిండి, మొక్కజొన్న పిండి బాగా కలపాలి. సన్ననిసెగ మీద ఈ మిశ్రమాన్ని గరిటెతో కలుపుతూ ఉండాలి. మిశ్రమం దగ్గరపడుతుండగా జీడిపప్పు ముద్దను చేర్చాలి. యాలకులపొడి కూడా చల్లి రెండు నిమిషాలయ్యాక దింపేయాలి. ఈ మిశ్రమాన్ని భాగాలుగా చేసి.. మనకు కావల్సిన రంగులు కలిపి.. చల్లారాక కొవ్వొత్తుల మాదిరి చేసుకోవాలి. పైన అదే మిశ్రమాన్ని వొత్తుల్లా చేసుకుంటే చాలు. నోట్లో వేసుకోగానే కరిగిపోయే కొవ్వొత్తులు సిద్ధం.
  • alaya300-50.gif
  • cinema-300-50.gif
  • sthirasthi_300-50.gif