Mon, February 08, 2016

Type in English and Give Space to Convert to Telugu

'పట్టణాభిషేకం''వాస్తవాల ప్రతిబింబంగా బడ్జెట్‌''నీటిపై నిప్పుల వాన''సీఎం మొండి అయితే.. నేను జగమొండి''తీరప్రాంత దేశాల మధ్య సహకారం పెరగాలి''ఉత్తర కొరియా రాకెట్‌ ప్రయోగం''చిరుతకు చిక్కి .. ప్రాణాలతో బయటపడి''మౌఖికంలో మార్కులు ఖాయం''ఎయిమ్స్‌కు 220 ఎకరాలు కేటాయింపు''‘అంకుర’ భయాలొద్దు'
కోట్లున్న వారికే తెల్లకోటు
తెలుగు రాష్ట్రాల్లో ప్రైవేటు వైద్య విద్య రుసుములు భారీగా పెంపు
ఎంబీబీఎస్‌కు రూ.50-70 లక్షల వ్యయం
ఏపీలో సీ కేటగిరీలో గరిష్ఠంగా రూ.2.75 కోట్ల ఖర్చు
ఆస్తులమ్మి చదివితే.. రాబట్టుకునేందుకు రోగులపైనే భారం
ఈనాడు- హైదరాబాద్‌
వైద్యవిద్య సామాన్యుడికే కాదు.. మధ్యతరగతికీ దూరమైపోతోంది. కోటీశ్వరులైతే తప్ప వైద్యవిద్య చదువు‘కొనే’ పరిస్థితి కానరావడం లేదు. నిర్వహణ ఖర్చులు ఎక్కువవుతున్నాయంటూ ఫీజులు పెంచుకునేందుకు ప్రైవేటు వైద్యకళాశాలలు డిమాండ్‌ చేస్తున్నాయి. ఎంతో కొంత నియంత్రించినా చివరకు రుసుములు పెంచుకునేందుకు ప్రభుత్వం అనుమతిస్తుండడం పరిపాటయిపోయింది. ఫలితంగా ఎంబీబీఎస్‌ చదువు అత్యంత ఖరీదైన వ్యవహారంగా మారిపోయింది. లక్షలాది రూపాయలు ఖర్చు పెట్టి చదివాం కాబట్టి వాటిని సాధ్యమైనంత తిరిగి రాబట్టుకోవాలనే ధోరణిలోకి విద్యార్థులను నెట్టేస్తోంది. వైద్యం వ్యాపారమయ్యే దుస్థితికి ఇదే ప్రధాన కారణమవుతోంది. తాజాగా తెలుగు రాష్ట్రాల్లో ప్రైవేటు వైద్య కళాశాలల్లో బీ, సీ కేటగిరీ (50 శాతం సీట్ల)లో ఎంబీబీఎస్‌ ఫీజులు భారీగా పెరిగిపోయాయి. నెలకు రూ.లక్ష ఆదాయం ఆర్జించేవారు కూడా ఏడాదికి రూ.9 లక్షల నుంచి రూ.12 లక్షలు పెట్టి తమ పిల్లలను చదివించుకోలేకపోతున్నామని ఆవేదన చెందుతున్నారు. ఐదేళ్ల ఎంబీబీఎస్‌ కోర్సు పూర్తవ్వాలంటే.. రూ.50 లక్షల నుంచి రూ.70 లక్షల వరకూ ఖర్చు పెట్టాల్సిందే. ఏపీలో సీ కేటగిరీలోని 15 శాతం వైద్యసీట్లలో ఐదేళ్ల ఎంబీబీఎస్‌కు ఒక్కొక్కరికి గరిష్ఠంగా రూ.2.75 కోట్లవుతుండడం పరిస్థితికి అద్దం పడుతోంది.
సేవకేదీ చోటు?
వైద్యుడికి సామాజిక బాధ్యత తప్పనిసరంటోంది భారతీయ వైద్య మండలి. ఇన్నిన్ని లక్షల రూపాయలు పోసి, వైద్య విద్యను కొనుక్కున్న వైద్యుడికి సామాజిక బాధ్యత గుర్తుకొస్తుందా అంటే సందేహమే. వైద్యవిద్యకు పెట్టిన భారీ పెట్టుబడిని సాధ్యమైనంత తక్కువ వ్యవధిలో రాబట్టుకోవడంపైనే దృష్టి సారిస్తున్నారు. భారీగా ఫీజులు, అవసరమున్నా లేకున్నా.. అడ్డగోలుగా నిర్ధారణ పరీక్షలు, ఒక మాత్రతో తగ్గే ఆరోగ్య సమస్యకు పది రకాల ఔషధాలను వినియోగించేలా రోగిని ప్రోత్సహించడం తదితర దోపిడీలకు తెరలేస్తోంది. నిర్వహణ వ్యయం పెరిగిపోతుండడం వల్లే ఫీజులు పెంచక తప్పట్లేదంటున్నాయి ప్రైవేటు వైద్య కళాశాలలు. ఈ నేపథ్యంలో సర్కారు వైద్య కళాశాలల్లో ఎంబీబీఎస్‌ సీట్ల సంఖ్యను పెంచుకోవడమే ప్రత్యామ్నాయంగా కనిపిస్తోంది. రానున్న నాలుగైదేళ్లలో ఇరు రాష్ట్రాల్లో కనీసం మరో వెయ్యి ఎంబీబీఎస్‌ సీట్లనైనా పెంచుకోగలిగితేనే వైద్యవిద్య కనీసం మధ్యతరగతికైనా అందుతుందంటున్నారు నిపుణులు.

ఆంధ్రప్రదేశ్‌లో మరింత భారం
ఆంధ్రప్రదేశ్‌లో గతేడాది ఫీజులు పెంచకుండా ఉపశమనమిచ్చిన సర్కారు 2015-16లో మాత్రం అడ్డగోలుగా పెంచేసింది.

* ప్రైవేటు వైద్య కళాశాలల్లోని 35 శాతం సీట్లను బీ కేటగిరీగా మార్చి.. ఫీజును రూ.5.50 లక్షల నుంచి రూ.11 లక్షలకు పెంచేసింది.

* ప్రవాస భారతీయుల కోటా కింద ఉన్న 15 శాతం సీట్ల ఫీజు గతేడాది వరకు రూ.5.50 లక్షలు. ఈ ఏడాది రూ.11 లక్షల నుంచి రూ.55 లక్షల వరకూ వసూలు చేసుకునేలా కళాశాలలకు అవకాశమిచ్చింది. అంటే సీ కేటగిరీలో ఐదేళ్ల ఎంబీబీఎస్‌ పూర్తయ్యేసరికి గరిష్ఠంగా రూ.2.75 కోట్లు చెల్లించాలి.


తెలంగాణలో రెండేళ్ల నుంచీ..
తెలంగాణలో 2014-15, 2015-16 విద్యాసంవత్సరాల్లోనూ ప్రైవేటు వైద్య కళాశాలల్లో ఫీజులు పెంచారు.

* 2014-15లో మైనారిటీయేతర వైద్య కళాశాలల్లో సీ1 కేటగిరీలో (25 శాతం) రూ.5.50 లక్షలున్న ఫీజును రూ.9 లక్షలకు.. సీ2 కేటగిరీలో ప్రవాస భారతీయుల కోటా(15 శాతం) కింద రూ.5.50 లక్షలున్న ఫీజును రూ.11 లక్షలకు పెంచింది.

* 2015-16లో బీ కేటగిరీ 10 శాతాన్ని యాజమాన్య కోటాలోని 25 శాతానికి కలిపి మొత్తం 35 శాతం సీట్లను బీ కేటగిరీగా మార్చింది. ఫీజును రూ.9 లక్షలుగా నిర్ణయించింది. దీంతో గతేడాది రూ.2.40 లక్షలతో లభించిన బీ కేటగిరీలోని 10 శాతం సీట్ల ఫీజు దాదాపు నాలుగింతలైంది.

* 2014-15లో మైనారిటీ వైద్య కళాశాలల్లో యాజమాన్య కోటాలోని 25 శాతం సీట్ల ఫీజును రూ.6 లక్షల నుంచి రూ.9 లక్షలకు పెంచింది. ఈ ఏడాది అది రూ.11 లక్షలైంది. గతేడాది ప్రవాస భారతీయుల కోటాలో 15 శాతం సీట్ల ఫీజును రూ.6 లక్షల నుంచి రూ.12 లక్షలకు పెంచగా ఇప్పుడు రూ.13.25 లక్షలకు పెంచుతూ ప్రభుత్వం ఉత్తర్వులిచ్చింది.

మాధవన్‌ పళ్లురాలగొట్టాను..!

సినిమా కోసం ఉత్తుత్తినే కాదు.. నిజంగానే అంతపని చేసిందట రితిక. గత వారం విడుదలై సంచలన విజయం సాధించిన ‘సాలా ఖడూస్‌’ చిత్రం కథానాయిక. అప్పుడెప్పుడో పరుగుల రాణీ...

‘శ్రీశ్రీ’ డబ్బింగ్‌ పూర్తి

అలనాటి తెలుగు సూపర్‌స్టార్‌ కృష్ణ, ఆయన భార్య విజయ నిర్మల కీలక పాత్రధారులుగా తెరకెక్కిన ‘శ్రీశ్రీ’ చిత్రం దాదాపు పూర్తయ్యింది....

 
 
 
 
 
Copyright © 2014 Ushodaya Enterprises Pvt. Ltd., All Rights Reserved.
For Digital Marketing enquiries contact 9000180611 or Mail :Marketing@eenadu.net